LA STORIE

Il prin document che si riferìs a Mueç al è dal 1072: castrum quod Mosniz nuncupatur (cjistiel clamât Mosniz).

Il non al ven probabilmentri di un non slâf, come che al è stât scuviert che à sein tancj altris toponims de valade. Tal cors dai secui i nons a son cambiâts: in furlan Mueç, in rosean Mosiz, in todesc Mosburg o Mosac, in latin Modium o Mosacium (di cui il non de abazie "mosacense").

Il document citât sore al conferme l'esistence, tai ains Mil, di un cjistiel medievâl, esistence confermade une seconde volte dal document pui cognossût che al à date 1084: la donazion dal feut di Mueç di bande dal cont Cacellino, nobilom carinzian, mestri sovran de cort imperiâl, al patriarcje di Acuilee Federico, so parint, par che al fasès al puest dal cjistiel un munistîr.

Di achi e tache la storie di Mueç che si lee cun la storie de Abazie:

1119 – Il patriarcje di Acuilee Voldarico al fâs consacrâ il munistîr di San Gjal di Andrea, vescul di Emona. Il prin abât al è Bebolfo e i fraris benedetins dal mantel neri. 

1329-1349 – Ghiberto da Marano al è l'abât. L'abazie e rive ae ponte de sô prosperitât: 146 proprietâts fondiaris, di chestis 101 in Friûl e 45 in Carinzie; la plene jurisdizion spirituâl, ae dipendence direte de Sante Sede, su lis glesiis dal Cjanâl dal Fier, de Val di Guart, di Osôf, di Dignan, di Flaiban, e di San Martin in Feistritz, e la jurisdizion temporâl, come feudatarie dal Patriarcje di Acuilee.

1401 – Dopo i abâts feudataris a rivin i abâts "in commendam", prelâts residents in altris abitancis e usufrutuari dai bens de abazie. Tra chescj il cardinâl Carlo Borromeo, vescul di Milan.

1761 – Daniele Dolfin, penultin abât "in commendam", al fâs fâ la gnove glesie de abazie in stîl baroc al puest de precedint glesie gotiche. Di cheste a son restâts il batisteri e il cjampanîl.   

1773 – Il Senât dal Venit al declare la fin de abazie di Mueç. I bens de abazie a vegnin comprâts par 44.000 ducâts dai siôrs Mangilli e Leoni, che a cjapin il titul di marchês di San Gjal. La jurisdizion eclesiastiche e passe al Vescul di Udin.     

1976 – Un fuart taramot al fâs grâfs dams al paîs e a murin 4 personis.

I monuments plui impuartants di Mueç a son:

Abazie di San Gjal: fate tal 1761 dal abât Daniele Dolfin e consacrade tal 1768 dal vescul di Udin Gradenigo. E à une stanze retangolâr a nâf ugnule. Tal presbiteri a son: l'orghin dal Nacchini dal XVIII Secul, il plui grant dal Friûl e l'ornament di len dal Deganutti che al è une vore preziôs e al è stât restaurât di recent.

In bande si cjatin doi grancj disens fats di Rigo tal 1893: a çampe il cont Cecellino al da il feut di Mueç al patriarcje Federico, a drete San Carlo Borromeo vignût a viodi l'abazie di Mueç.

Sot, bancjis dutis in cocolâr lavorât, che a coventin par lis grandis ocasions. Ai flancs dal altâr baroc, lis statuis di San Gjal e di San Carlo Borromeo.

Te stanze: cuatri altârs laterâi dal 1700; a çampe doi altârs dedicâts ae Madone: un cun statue dal 1645 fate di une persone scognossude, chel altri al à une grande pale de Madone cul Frut, S. Antoni e S. Nicolò del Buttafuoco; tal mieç un lampadari impuartant in fier batût e in len lavorât e cuviert in lamine di aur, fat di 1500 tocs che si smontin, clamât "glogje"; tes dôs bandis doi confessionâi dal 1700 e doi fats ancjemò prin; su lis parêts a son disens di Rigo; sul sofit un disen, fat di Tiozzo, al rimplace chel di prin che al è stât ruvinât dal taramot.

Tal curidôr, in direzion de capele dal Santissim, a si cjate un Crist crocifìs, in len di cocolâr piturât tal 1466. Une volte si cjatave tal arc trionfâl de precedìnte glesie gotiche; a drete si cjate il batisteri, fat cul la precedint glesie, dulà che si viôt un fresc de parabule des Vergjinis.

Convent benedetin: dal 1987 al è convent di clausure des Muinis Clarissis che a àn il sacrament. Al à plante a forme di retangul, cun arcs un pôc sbassâts, cinc da bande plui grande e trê in chê plui piçule. Une elegante balconade cun pilastris a sezion cuadrade e si viôt al prin plan che e ten su il cuviert in trâfs e cops.

Tor medievâl: clamade par solit "palaç des presons" e je probabilmentri une des tors dal cjistiel medievâl usade poi come palaç di justizie e, al timp di Napoleon, come preson di mandament. Une volte e veve 4 plans, al inizi dal 1800 e è stade sbassade a 3 plans. Cumò e ven doprade come sede par mostris di art.

Berline: colone in piere dal 1653 e à la scrite di suplizi dai malvivents. E je la testemoneance dal podê judiziari esercitât de abazie sul feut di Mueç. Metude al inizi dal viâl che al puarte al convent, e coventave par lis bachetadis dai condanâts.

Glesie di Sant Spirit: fate tal 1516, in stîl gotic, slargjade a trê navadis tal XVII secul e distrute dal taramot dal 1976. Il cjampanîl, une vore ruvinât, al è stât restaurât di pôc.

In vie Abazie a son interessantis lis cjasis Rodolfi e Deganutti, restauradis dopo il taramot cui fonts dal plan di riscat dai bens ambientâi elaborât de Aministrazion Regjonâl.

Vignint ju a Mueç, in Place dai Ufizis si cjate la façade dal Municipi, dal XVIII secul, cul so aspiet di stîl classic, al è un bon esempli di edifici public.

Al inizi di vie Traversigne si viôt, a drete, la vile in stîl Liberty dal inizi dal '900, biele te contignude elegance di liniis e decorazion.

A çampe, un esempli di cjase tradizionâl dal 1800 di famee benestant di Mueç, cumò divignude locande. Si notin: il grant porton cun lunete; i antîi in piere; un comut curidôr che al puarte a lis 4 stanzis cun sofit cun lis trâfs che si viodi; vicin de cusine, il fogolâr.

Lant indevant, ae prime crosere a drete, la cjase Tolazzi, cun linde a arcs a dut sest in tof e al plan tiere i sofits a volte. Pôc dopo, a çampe, une tipiche cjase dal 1700 cun scjalis e lindis par fûr.

De place, vignint ju pe strade di vie Fontane si pues viodi la cjase Tessitori, cun grant puarti. Tal placial G. Nais, dopo il monument a Linussio e il Monument ai Muarts in Vuere, si rive in Borc Linussio, un grup di edificis che a fasevin part de vecje fabriche di stofis Linussio. Une clâf di volte e je il simbul de famee Linussio e si viôt ancje la date di costruzion: 1722.

A àn un grum di valôr architetonic lis glesiis des frazions: S. Antonio Abate - S. Antoni Abât a Ovedas fate tal 1434; S. Floriano - S. Florean a Dordole, blancje elegant costruzion che si cjate intun biel prât vert parsore de Val Aupe.

Lis gleseutis dai borcs plui disasiâts: lis glesiis di Stai, Muiesse, Muntisel, Riulade a son stadis fatis tai Ains Trente daûr di un progjet unic: plante a forme di retangul cun cope a plui cjantons. Il taramot al à distrut la gleseute di Muntisel, che e je stade fate su di gnûf, impen lis altris a son stadis restauradis grazie al gjenerôs intervent dai volontaris.

Interessantis lis capelutis, lis capelis, lis iconis, i crucifìs fats dai cjanalots tes stradis e tai trois di mont: tes sielis, tes crosadis e doncje ai puints.

Cualchi foto di Mueç foto di fate in timp di taramot

Par zentîl concession de Siore Marilena Gherasim e dal Siôr Mauro Tolazzi